Eurozona në “vrull”- Ekonomia rritet me 2.5% në T3, norma e papunësisë bie në 8.9%

Rimëkëmbja e ekonomisë së Eurozonës ka vazhduar përgjatë tremujorit të tretë, me Produktin e Brendshëm Bruto që u rrit sipër projeksioneve për periudhën.

Të dhënat paraprake të publikuara nga Eurostat, treguan se Produkti i Brendshëm Bruto për tremujorin e tretë, u rrit me 0.6% me bazë tremujore, nga 0.7% që ishte në të dytin.  Megjithatë, treguesi me bazë vjetore  shënoi 2.5% duke thyer projeksionet dhe duke kaluar rritjen  vjetore të tremujorit të dytë prej 2.3%.

Rritja ekonomike në bllokun e valutës së përbashkët ka sjellë edhe rënien e papunësisë në nivelin më të ulët që prej Janarit 2009, duke thyer pritshmëritë e analistëve. Norma e papunësisë ra në 8.9%, apo në 14,5 milionë gjatë Shtatorit,  nga 9% që ishte në muajin e kaluar.

Në të gjithë Bashkimin Europian, norma mbeti e pandryshuar në 7.5%, që është niveli më i ulët që prej Nëntorit 2008. Ndër vendet anëtare, normën më të ulët e regjistroi Çekia me 2.7%, ndjekur nga Gjermania dhe Malta me 3.6% dhe 4.1% në mënyrë respektive. Normën më të lartë vazhdon ta mbajë Greiqa, në 21%, ndjekur nga Spanja me 16.7%, pavarësisht se për të dy vendet, ka patur rënie.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.