Eurozona rritet me 0.5% në tremujorin e parë, dobët vetëm Italia

Prodhimi i Brendshëm Bruto në Eurozonë dhe në Bashkimin Europian është zgjeruar me 0.5% në tremujorin e parë të këtij viti, tregojnë të dhënat e sapopublikuara nga zyra e statistikave të Bashkimit Europian.

Sipas Eurostat, në terma vjetorë, rritja fiksohet 1.7 dhe 2% respektivisht. Të dhënat konfirmojnë se ekonomia europiane vijon të jetë në vrull.

Rumania ndërkohë është ekonomia europiane me rritjen më të shpejtë gjatë tremujorit të parë të vitit, ndërkohë që Greqia raporton rezultatin më të dobët, në kontraktim me 0.1%.

Të gjitha vendet e tjera të rajonit raportojnë shifra pozitive rritje. Ekonomia më e madhe e rajonit, Gjermania, u rrit me 0.6%, ndërkohë që Franca u rrit me 0.3%. Rezultat zhgënjyes raporton Italia, me një normë rritje të ekonomisë prej vetëm 0.2%.

Performancë mjaft pozitive vazhdon të regjistrojë edhe Spanja, që është edhe ekonomia e katërt më e madhe e rajonit, në rritje me 0.8% gjatë tre muajve të parë të këtij viti.

Të dhënat e Eurostat tregojnë gjithashtu se, tashmë Europa i`a ka kaluar shteteve të bashkuara të Amerikës sa i përket termave të rritjes.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.