Eurozona tkurret më pak nga sa pritej – Eurostat: Fundviti, më pozitiv. Gjermania dhe Spanja tregojnë rritje
Ekonomia e Eurozonës është tkurrur më pak se ç’pritej në tremujorin e katërt 2020, në një kohë të karantinës së koronavirusit, ndërkohë që ekonomi të mëdha si Gjermania dhe Spanja i’a dolën të tregojnë një rritje të vogël, sipas të dhënave fillestare të BE. Zyra e Statistikave e bllokut, Eurostat, theksoi se produkti i Brendshëm Bruto në 19 vendet që ndajnë euron, ra me 0.7% në tremujorin e katërt nga i treti dhe me 5.1% me bazë vjetore.
Ekonomistët prisnin një rënie me 1% tremujore dhe me 5.4% vjetore, pas rimëkëmbjes së fortë në tremujorin e tretë, ku Eurozona hoqi kufizimet në udhëtime. Të dhënat paraprake të Eurostat, treguan se ekonomia e dytë dhe e tretë më e madhe e Eurozonës, Franca dhe Italia, ndikuan negativisht tek treguesi i përgjithshëm, pasi u tkurrën me 1.3% dhe me 2% në mënyrë respektive. Ndërkohë, gjermania u rrit me 0.1% nga tremujori i tretë dhe Spanja, me 0.4%. Eurostat theksoi se sipas vlerësimit fillestar të vitit të plotë 2020, Produkti i Brendshëm Bruto ra me 6.8% në të gjithë Eurozonën dhe me 6.4% në Bashkimin Europian.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.