Eurozonë, bizneset në vrull – Porositë e mëdha nga jashtë sjellin nevojën e zgjerimit të fuqisë punëtore
Ekonomia e Eurozonës ka mbajtur një vrull të fortë në fillim të tremujorit të fundit të këtij viti, ndërkohë që rritja e kërkesës ka inkurajuar kompanitë që të rrisin stafin me normën më të shpejtë në një dekadë.
Treguesi PMI, që krijohet nga sondazhe mujore drejt mijëra kompanive, pati rënie për Tetorin, megjithatë, krijimi i vendeve të punës në manifakturë është rritur në nivelin më të lartë që prej vitit 1997. Kjo, sipas analistëve, reflekton porositë e mëdha të nxitura nga kërkesat jashtë bllokut të valutës së përbashkët.
Punësimi në sektorin e shërbimit tregoi gjithashtu shenja të fuqizimit. Rimëkëmbja e Eurozonës ka fituar vrull dhe Banka Qendrore Europiane do të vendosë këtë javë mbi mënyrën se si do të përfundojë stimujt monetar.
Institucioni i jep stimuj aktualisht ekonomisë duke blerë 60 miliardë euro tituj borxhi çdo muaj dhe po konsideron përgjysmimin e kësaj shume në vitin që vjen. Kompania që ndërmerr sondazhet, Markit, raportoi se rritja e kapacitetit do të ketë një ndikim pozitiv për çmimet.
Inflacioni në bllokun e valutës së përbashkët qëndroi në 1.5% për Shtatorin, poshtë objektivit të Bankës Qendrore Europiane.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.