Eurozonë – Hera e parë në tre vite, importet tejkalojnë eksportet
Për herë të parë në tre vite, Eurozona ka regjistruar një deficit tregtar. Të dhënat e publikuara nga Eurostat i referohen muajit të parë të vitit. Gjatë Janarit, eksportet e Eurozonës u rritën me 13%, në 163.9 miliardë euro.
Por rritja e eksporteve është zbehur nga rritja edhe më e madhe e importeve, me 17%, në vlerën e 164.5 miliardë eurove. Kjo është hera e parë që prej vitit 2014 që tregtia e jashtme e Eurozonës hyn në deficit.
Situata deficitare në tregti nga ana tjetër është e pazakontë për sezonin e dimrit. Përgjatë të gjithë vitit 2016 ndërkohë, Eurozona eksportoi rreth 2 trilionë euro në të gjithë botën.
Importet ndërkohë ranë me 2% gjatë vitit të kaluar. Tregtia mes vendeve të eurozonës ndërkohë fiksohet në 1.7 trilionë euro përgjatë të gjithë vitit 2016.
Gjatë Janarit ndërkohë, 28-ëshja e Bashkimit europian regjistron gjithashtu një situatë deficitare, në 16.2 miliardë euro. Brenda rajonit të monedhës së përbashkët, tregtia prek vlerën e 145.7 miliardë eurove, në rritje me 10% në krahasim me të njëjtën periudhë të vitit të kaluar.
Gjermania ndërkohë vijon të raportojë suficiti të thellë tregtar, si brenda unionit, ashtu edhe jashtë. Franca dhe Italia, që janë edhe ekonomia e dytë dhe e tretë më e madhe raportojnë situatë deficitare.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.