Fabrikat ndalojnë vrullin – Ndikon rënia e kërkesës në Eurozonë, ngadalësimi është i përkohshëm
Fabrikat në zonën e valutës së përbashkët kanë pësuar ngadalësim për të tretin muaj radhazi gjatë Marsit, ndërkohë që optimizmi është zbehur dhe kërkesa ka rënë. Megjithatë, sipas sondazheve drejt firmave të sektorit privat, prodhimi mbetet ende i fortë dhe ekspansioni është i përhapur gjerësisht në të gjithë rajonin.
Fabrikat e mbyllën 2017-ën në performancë të fortë dhe ngadalësimi i kohëve të fundit nuk ka gjasa të ndërhyjë te politikëbërësit e Bankës Qendrore Europiane, në heqjen e stimujve monetarë.
Indeksi PMI, që formulohet nëpërmjet sondazheve, tregoi rënie për muajin Mars. Sipas analistëve, të dhënat nuk përbëjnë shqetësim pasi pritej një korrigjim pas performancës së fortë në fundvit.
Optimizmi te fabrikat ra në nivelin më të ulët që prej fundit të 2016-ës dhe kërkesa për produktet ishte më e dobëta në 16 muaj. Rënia e kërkesës shpjegohet nga rritja e çmimeve përsëri nga firmat, ndërkohë që edhe euro e fortë ka bërë eksportet e bllokut më pak të tërheqshme.
Inflacioni arriti në 1.4% gjatë muajit të kaluar, që është ende poshtë objektivit të BQE në pranë 2%. Ekonomia e Eurozonës ndodhet në performancën më të mirë në 1 dekadë dhe sipas anëtarit të bordit të BQE, Ewald Nowotny, institucioni pritet të vendosë këtë verë për të reduktuar blerjet e obligacioneve.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.