Facebook fshin 2,632 llogari – Përdoruesit në Iran, Rusi, Maqedoni e Veriut, Kosovë, në “sjellje joautentike”

Facebook deklaroi këtë javë se ka fshirë shumë llogari të përdoruesve nga Irani, Rusia, Maqedonia e Veriut dhe Kosova, duke thënë se janë përfshirë në “sjellje jo-autentike të koordinuar”.

Në total, 2,632 faqe, grupe dhe llogari personale janë fshirë nga Facebook dhe Instagram për veprime të lidhura me vendet e lartpërmendura, deklaroi platforma e medias sociale. Sipas Facebook, 513 nga këto llogari lidheshin me Iranin, ndërsa 1907 me Rusinë. Llogaritë ruse u fshinë kryesisht për dërgimin e informacioneve të padëshiruara drejt përdoruesve (spams) dhe një pjesë e vogël e këtyre, ishin përfshirë në sjellje joautentike, sipas deklaratës.

Facebook bëri të ditur se faqet dhe llogaritë janë fshirë për sjelljen dhe jo përmbajtjen e postimeve. Platforma e medias sociale është përpjekur së fundmi të lokalizojë dhe mbyllë llogari të tilla në shumë vende, pasi është vënë në presion gjatë viteve të fundit për sjelljen e ngadaltë në zhvillimin e mjeteve që luftojnë përmbajtjet ekstremiste dhe propagandat.

Kompania ka fshirë gjithashtu një serë llogarisë personale në Iran gjatë muajit Janar.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.