Facebook kërkon të krijojë kriptovalutën e vet – Gati ekipi, kryesohet nga ish-presidenti i Paypal

Gjigandi i teknologjisë, Facebook, po shqyrton mundësitë për krijimin e kriptovalutës së saj, një monedhe virtuale e cila do të përdoret nga 2 miliardë përdoruesit e saj në të gjithë botën për të bërë pagesa elektronike.

Në fillim të javës, rrjeti social njoftoi krijimin e një ekipi për teknologjinë blockchain, e cila është e njëjta që përdorin valutat virtuale si Bitcoin. Por tashmë burime brenda kompanisë tregojnë se Facebook është shumë serioz mbi krijimin e kësaj kriptovalute.

Grupi do të kryesohet nga zëvendëspresidenti në krye të Messenger, David Marcus, i cili do të shikojë se si platforma sociale mund ta shfrytëzojë këtë teknologji në zhvillim. Përpara se t’i bashkohej Facebook, Marcus ishte presidenti i Paypal, shërbim i cili aktualisht ka thjeshtuar transaksionet mes njerëzve në aplikacionin e Messenger.

Marcus është gjithashtu një nga investitorët e parë në Bitcoin, ndërsa në Dhjetor iu bashkuar bordit drejtues të Coinbase, një nga shërbimet më popullore të shkëmbimit të kriptovalutave.

Kjo nuk do të ishte hera e parë që platforma sociale eksperimenton me valutat virtuale. Në vitin 2009, kompania nxori Facebook Credits, të cilat mund të përdoreshin për të blerë mallra virtualë në lojëra të përdorura si Farmville. Megjithatë opsioni nuk fitoi kurrë terren dhe disa vite më vonë Facebook e mbylli.

Por sot tregu i kriptovalutave paraqitet krejtësisht ndryshe. Popullariteti i Facebook do të ndikonte pozitivisht tek vlera e valutës, e cila mund të bëhej në një konkurrente serioze edhe të vetë Bitcoin. Megjithatë, planet për realizimin e kësaj gjëje kërkojnë të paktën disa vite.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.