Fajdet, rrezik për pastrim parash – DPPPP: Në lupën e Sektorit të Analizës Strategjike, huatë informale dhe shoqëritë e transfertave

Fajdet dhe paratë e futura në vend përmes shoqërive të transfertave konsiderohen ndër aktivitetet me risk më të lartë nga Drejtoria e Përgjithshme e Parandalimit të Pastrimit të Parave. Televizioni Scan ka zbardhur raportin vjetor të punës së Drejtorisë, ku theksohet se Veprimtaria e Sektorit të Analizës Strategjike të këtij institucioni është përqendruar te analizat sektoriale të tilla si: huatë informale, analizë në lidhje me raportimet e shoqërive të transfertave, në bazë të cilave janë trajtuar dhe dërguar informacione për aktivitet të dyshimtë në organet ligj zbatuese.

Sipas Drejtorisë, Dokumenti i vlerësimit të riskut i është dërguar të gjitha institucioneve relevante në vend, organeve mbikëqyrëse, subjekteve financiare e më tej në bazë të konkluzionet e tij është hartuar një plan veprimi për marrjen e masave për risqet kryesore të identifikuara.

Për vitin 2019, në adresë të Drejtorisë së Parandalimit të pastrimit të parave janë raportuar 1,424 transaksione të dyshimta. Sipas raportit zyrtar të këtij institucioni për vitin 2019, numri i raportimeve është 6.6% më i ulët nga një vit më parë. Drejtoria e Pastrimit të Parave e justifikon këtë rënie të raportimeve me argumentin se disa subjekte janë ndërgjegjësuar më tepër në drejtim të rritjes së cilësisë të denoncimeve të dërguara.

Disa nga subjektet që kanë pësuar rënie janë: noterët, Kadastra, shoqëritë e institucioneve të qiradhënies financiare, apo shoqëritë e pagesave elektronike. “Për sa i përket uljes së numrit të raportimeve të RAD-ve nga noterët konstatojmë se kjo mund të ketë ardhur për shkak të uljes së raportimeve nga dy prej tyre pas trajnimeve të kryera nga DPPPP dhe ndërgjegjësimit të tyre për rritjen e cilësisë së raportimit dhe fokusimin në rastet me indicje dhe anomali të mirëfillta në funksion të parandalimit të pastrimit të parave”, thekson raporti.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.