Fajin e kishte bateria! Samsung detajon hetimin e Note 7, do të vonojë Galaxy S8
Samsung më në fund ka detajuar rezulatin e hetimit të Note 7, produkt që u hoq nga tregu prej problemeve me mbinxehjen.
Prodhuesi më i madh i smartphone-ëve në botë deklaroi se bateritë difektoze nga 2 furnitorë janë shkaktarë për dështimin e Note 7, që i hoqi kompanisë 5.3 miliardë dollarë nga fitimi operacional. Presidenti i kompanisë, Koh Dong-jin tha se janë marrë masa që të shmanget përsëritja e shpërthimeve të produkteve, ndërkohë që Samsung përgatitet të nxjerrë në treg Galaxy S8.
“Mësimet nga ky incident janë ngulitur në kulturën tonë. Samsung do të përpiqet të rifitojë besimin e konsumatorëve”, tha presidenti i kompanisë. Ai shtoi se Galaxy S8 nuk do të shfaqet në Kongresin Botëror të Celularëve në Barcelonë në muajin Shkurt, që është forumi ku seritë Galaxy S publikohen. Investitorët thonë se Samsung duhet të sigurojë konsumatorët se defekti i Note 7 nuk do të përsëritet. Hetimet nga ekspertë të jashtëm treguan se nuk kishte probleme në hardware dhe software të produktit. Rezultatet treguan se çështja qëndronte te bateria. “Elektroda në pozicione specifike brenda baterive krijonin kontakt me njëra-tjetrën duke shkaktuar qark të shkurtër, që çonin në mbinxehjen e produkteve”, tha presidenti i kompanisë.
Në total, 200 mijë celularë dhe 30 mijë bateri, u kontrolluan gjatë hetimit. Bateria e serive fillestare të Note 7 ishin prodhuar nga filiali Samsung SDI, ndërsa zëvëndësimet pas tërheqjes së produkteve, që ishin gjithashtu difektoze, qenë prodhuar nga Amperex Technology. Samsung bëri të ditur se ka pranuar përgjegjësinë dhe nuk do të marrë masa ligjore kundër furnitorëve.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.