Falimenti, ndryshojnë rregullat! Në fuqi standardet e reja, shitja e biznesit në ankand apo me oferta, si shkarkohet administratori

Janë publikuar tashmë në Fletoren Zyrtare standardet e reja për administrimin dhe regjistrimet kontabël të mjeteve monetare nga administratori i falimentimit, si pjesë e masës së falimentimit, gjatë procedurave të falimentimit.

Dokumenti rregullon në mënyrë të detajuar veprimet e procedurat që duhet të ndjekin administratorët e falimentit që nga momenti i mbylljes së llogarive të biznesit,  administrimi i mjeteve monetare, te hapja e një llogarie të re bankare e deri te investimi i tyre. Për të shkuar më pas te Inventari i aktiveve të debitorit, te përgatitja e raportit ekonomik e financiar të debitorit, e mënyrat e shitjes së aktiveve apo tërë biznesit.

Aktivet e debitorit do të shiten sipas parashikimeve në ligjin “Për falimentimin”, standardeve kombëtare për administrimin e masës së falimentimit dhe formave të tjera të parashikuara në ligje të veçanta. Procedura e shitjes së aktiveve të debitorit ose biznesit si një i tërë mund të realizohet përmes shitjes në ankand të hapur, shitje nga mbledhja e ofertave publike; dhe së fundmi përmes shitjes me marrëveshje të drejtpërdrejtë.

Në rast se është e mundur, biznesi do të shitet si një biznes në vazhdimësi ose njësi biznesi, brenda masës së falimentimit do të transferohen si biznese në vazhdimësi. Në rast se asetet shiten individualisht, ankandi do të jetë mënyra e preferuar.

Ankandi mund të shmanget, vetëm kur administratori i falimentimit, në mënyrë objektive, merr në konsideratë forma të tjera likuidimi si mënyra më e përshtatshme e kryerjes së procedurës së shitjes.
Rregullat e reja përcaktojnë edhe rastet kur kompania debitore mund të kërkojë shkarkimin e administratorit.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.