Faljet e para në Hagia Sophia. Erdogan i bashkohet besimtarëve te ndërtesa e konvertuar në xhami
Mijëra turq u mblodhën pranë Hagia Sophia-s ditën e Premte, ndërkohë që imamët recituan brenda ndërtesës historike, përpara lutjeve të para që kur presidenti Recep Tayyip Erdogan e deklaroi një xhami. Turmat u mblodhën në pika përreth qendrës historike të Stambollit, ku mijëra trupa të policisë ruajtën sigurinë. Ndërsa hynë në zonën e sigurtë, besimtarët të veshur me maska, u ulën në qilimet e tyre ku falen, në sheshin SultanAhmet.
Gjykata kryesore turke lajmëroi këtë muaj se ka anuluar statusin e Hagia Sophia si një muze. Erdogan e ktheu menjëherë në xhami, ndërtesën që ka qenë katedrale bizantine e krishterë për 900 vite, përpara se të pushtohej nga otomanët. Ndërtesa ka qenë një xhami deri në vitin 1934. Gjatë sundimit 17-vjeçar, Erdogan ka përkrahur fenë islame dhe ka mbështetur përpjekjet për të rikthyer statusin e xhamisë të Hagia Sophia. Ai tha se myslimanët do të mund të falen atje përsëri dhe e ka përmendur çështjen gjatë fushatës në vitin e kaluar. Konvertimi shkaktoi kritika të ashpra nga liderët e krishterë, që thanë se do të thellojë ndasitë fetare.
Turqia zyrtare thekson se qendra do të vazhdojë të jetë e hapur për vizitorët dhe veprat e artit do të mbrohen. Erdogan ka riformuar republikën moderne turke, të themeluar thuajse një shekull më parë nga Mustafa Kemal Ataturk, duke hequr ndalimin për të vendosur shamitë në publik, promovuar edukimin fetar dhe zbutur ushtrinë e fuqishme të vendit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.