Fasonet, 417 mln euro për 2018 – Rritja e llogaritur në lekë ishte 18%
Sektori fason solli 417 milionë euro në ekonominë shqiptare për vitin e kaluar. Sipas Bankës së Shqipërisë, të ardhurat nga shërbimet e përpunimit të mallrave për llogari të kontraktorëve të huaj u rritën me 24% krahasuar me vitin 2017.
Shifrat tregojnë se viti i i kaluar për fasonistët ishte pozitiv, pavarësisht alarmit të ngritur prej tyre për zhvlerësimin e euros. Të ardhurat e sektorit ishin në rritje, edhe po t’i llogarisim në lekë. Kështu, për vitin 2017, me një kurs mesatar këmbimi euro-lek 134.2 , të ardhurat e sektorit fason nga jashtë ishin rreth 45 miliardë lekë. Për vitin 2018, kur një euro këmbehej mesatarisht me 127.6 lekë, të ardhurat e sektorit fason arritën në 53.2 miliardë lekë. E llogaritur në lekë, rritja vjetore e të ardhurave ishte rreth 18%. Pavarësisht se zhvlerësimi euros kuptueshëm ka pasur një kosto, shifrat duket se nuk justifikojnë alarmin e ngritur nga sipërmarrësit e këtij sektori.
Burimi: Banka e Shqipërisë
Sektori i fasonerisë, sidomos në degët e produkteve tekstile dhe këpucë, duket mjaft i shëndetshëm, pavarësisht krizës ekonomike në tregjet kryesore porositëse. As dyshimet lidhur me aftësinë e këtij sektori për të mbijetuar në afatin e gjatë, për shkak të konkurrencës nga vendet me kosto më të ulëta të punës, nuk po vërtetohen. Falë afërsisë gjeografike me Europën Perëndimore, përvojës së fituar në 25 vjet, por edhe falë pagave shumë të ulëta, fasoneria shqiptare po arrin jo vetëm të mbijetojë, por edhe të rritet vit pas viti. Ky sektor është grupi me peshën më të lartë ndër eksportet shqiptare, me mbi 40% të totalit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.