“Fati” i punonjësve të hekurudhës – Krijimi i 4 shoqërive të reja aksionere, ristrukturim edhe për stafin

Ndarja e shoqërisë “Hekurudha Shqiptare” pritet të sjellë një ristrukturim të thellë në drejtim të punonjësve aktualë, duke mos përjashtuar edhe pensionet e parakohshme për një pjesë prej tyre.

Sipas projektligjit të nxjerrë për konsultim publik, i cili parashikon krijimin e 4 shoqërive të reja aksionere,  bordi i Hekurudhës do të duhet të krijojë planin social dhe do të përcaktojnë se cilët nga punonjësit do të jenë të punësuar dhe cilët do të duhet të dalin në pension të hershëm apo të plotë.

Po ashtu, plani social do të përcaktojë gjithashtu ndarjen e pagesave të pensioneve midis katër kompanive. Sipas relacionit që shoqëron projektligjin,  në programin Buxhetor Afatmesëm 2020-2022, është parashikuar fondi 400,000,000 lekë për mbështetjen e Sektorit të Hekurudhës.

Me këtë fond mbulohen shpenzimet për paga dhe sigurime shoqërore për punonjësit ekzistues të administratës që do të shpërndahen në katër shoqëritë e reja që dalin nga ristrukturimi.

Më konkretisht, nga ndarja do të krijohet shoqëria Aksionere Hekurudhore për Infrastrukturën, Shoqëria për Transportin e Pasagjerëve, shoqëria për transportin e Mallrave dhe ajo për Mirëmbajtjen e Mjeteve Lëvizëse.

Ndërkohë që, personeli ekzistues do të shpërndahet edhe në organet e reja rregullatore. Kjo pasi, krahas ndarjes së shoqërisë “Hekurudha Shqiptare” do të krijohen dhe Autortieti Rreguillator Licencues, Autoriteti i Sigurisë Hekurudhore dhe Autoriteti Kombëtar i Investigimit të Aksidenteve dhe Incidenteve.

Sipas autoriteteve, tregu kërkon urgjentisht ndarjen e Infrastrukturës hekurudhore nga operimi, si një kërkesë e vazhdueshme nga BE dhe si një mundësi për zhvillimin e saj.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.