Fatkeqësitë natyrore, “bum” sigurimesh – Rriten me 25% në 2018, dëmet e paguara rriten me 67%

Shqiptarët duket se janë ndërgjegjësuar disi për të siguruar pronën e tyre ndaj fatkeqësive natyrore. Të dhënat më të fundit nga Autoriteti i Mbikëqyrjes Financiare tregojnë se gjatë 6-mujorit të parë të vitit, primet e shkruara bruto për sigurimin e pronës ndaj zjarreve dhe fatkeqësive të tjera natyrore janë rritur në masën 25%.

Numri i kontratave ndërkohë është rritur në masën 10%. Gjatë periudhës Janar-Qershor 2018 u paguan 851 milionë lekë prime bruto, ndërkohë që gjatë së njëjtës periudhë të një viti më parë kjo shumë fiksohej në 681 milionë lekë.

Kjo rritje ka bërë që kjo kategori të rrisë lehtë peshën që ka në tregun e sigurimeve të jo-jetës, nga rreth 10% në rreth 12% të tregut. Në rritje të konsiderueshme, në masën 66.95% janë edhe dëmet e paguara në këtë kategori sigurimi.

Gjatë periudhës Janar-Qershor 2018, dëmet kapin vlerën e 246 milionë lekëve, nga 147 milionë lekë të së njëjtës periudhë të një viti më parë. Pavarësisht progresit, ndërgjegjësimi për të siguruara pronën ndaj fatkeqësive si zjarret, përmbytjet, tërmetet e çdo lloj tërbimi tjetër të natyrës, vijon të mbetet i ulët.

Gjatë këtij viti, problem kryesor kanë qenë përmbytjet, të shtrira në thuajse të gjithë territorin e Republikës dhe në një kohështrirje të konsiderueshme.

Projeksionet më të fundit, edhe nga institucionet ndërkombëtare ndërkohë japin alarmin dhe për rrezikun në rritje të ndjeshme ndaj zjarreve në vendin tonë.

Ekspertët, autoritet shtetërore dhe kompanitë e sigurimit kanë bërë vazhdimisht apel ndaj qytetarëve, sidomos ata që preken drejtpërdrejtë që të sigurojnë pronën e tyre ndaj fatkeqësive natyrore.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.