Fatkeqësitë natyrore – Shqiptarët, gjithnjë e më pak të siguruar
Sigurimi i shqiptarëve kundër fatkeqësive natyrore ka përmasa gjithnjë e më të vogla. Të dhënat e Autoritetit të Mbikëqyrjes Financiare tregojnë se në gjysmën e parë të këtij viti, primet e sigurimit në këtë klasë pësuan një rënie drastike me 35% krahasuar me të njëjtën periudhë të një viti më parë.
Gjithsej, në gjashtë muaj u shpenzuan vetëm 555 milionë lekë për t’u siguruar nga zjarri dhe forcat e tjera të natyrës. Kjo shifër përbën rreth 7.5% të volumit total të tregut të sigurimeve. Shqipëria në dekadat e fundit është prekur me shpeshtësi të konsiderueshme nga fatkeqësi natyrore, sidomos nga përmbytjet dhe zjarret. Gjithashtu, të qenit zonë sizmike bart rreziqe edhe nga lëkundjet e tërmeteve, siç ndodhi shpesh verën e kaluar e siç po ndodh edhe këtë vit, sidomos në pjesën juglindore të vendit. Por, pavarësisht rreziqeve, vit pas viti nuk duket të ketë ndonjë rritje të ndërgjegjësimit të publikut për t’u siguruar.
Tregu i sigurimeve në vend mbahet në masën dërrmuese nga sigurimet e detyrueshme ose gjysmë të detyrueshme. Kjo tendencë po theksohet edhe më shumë gjatë këtij viti. Për 6-mujorin e parë, sigurimet e detyrueshme motorrike sollën rreth 66% të primeve të shkruara bruto në sigurimet e jo-jetës. Edhe tregu modest i sigurimit të jetës e rriti më tej varësinë nga produkti i sigurimit të jetës së debitorëve, që arriti në afro 63% të totalit. Varësia e zakonshme nga këto produkte bën që tregu të jetë shumë i kufizuar edhe në potencialet e rritjes. Për gjysmën e parë të vitit, tregu i sigurimeve në vend u rrit me 5% krahasuar me një vit më parë dhe kontributin kryesor e dhanë pikërisht sigurimet e detyrueshme.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.