Fatura e aksidenteve – 16 milionë euro për 6 mujorin e parë të vitit
Instituti i Statistikave raporton shifra më të ulëta të aksidenteve rrugore gjatë këtij viti, por dëmi ekonomik i tyre vazhdon të rritet.
Mbështetur në të dhënat e 7-mujorit, në Shqipëri kanë ndodhur 862 aksidente, në rënie me 11% krahasuar me të njëjtën periudhë të një viti më parë. Edhe numri i të aksidentuarve paraqitet në rënie, me 7% më pak.
Nga të dhënat e 7-mujorit, mund të llogaritet se në Shqipëri ndodhin mesatarisht 4 aksidente dhe dëmtohen 6 individë në ditë. Në 90% të rasteve, shkaktarë të aksidenteve janë drejtuesit e mjeteve.
Dëmet e aksidenteve ngelen edhe shpenzimi kryesor për kompanitë e sigurimeve në vend. Për gjysmën e parë të vitit, në klasat e sigurimit të detyrueshëm motorrik dhe në sigurimin kasko të mjeteve tokësore u paguan gjithsej 1.6 miliardë lekë dëme.
Nëse shtojmë edhe dëmet e paguara për Fondin e Kompensimit, shifra totale arrin në afro 2 miliardë lekë ose rreth 16 milionë euro vetëm për pjesën e parë të vitit. Krahasuar me 6-mujorin e parë të vitit të kaluar, vlera e dëmeve të lidhura me aksidentet rrugore është rritur me 4%.
Për çdo 100 lekë dëme të paguara këtë vit, afërsisht 70 lekë lidhen me aksidentet rrugore.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.