Fatura e “kripur” e tërmetit – Si do të adresohen nevojat nga fondet që do të mblidhen nga donatorët
Tërmeti shkatërrimtar i 26 Nëntorit la pas një faturë të “kripur” për ekonominë e vendit, pasojat e së cilës do të ndjehen edhe në vitet në vijim. 985 milionë euro janë dëmet dhe humbjet e shkaktuara në raportin 86% me 14 %, ndërsa mbi 1 miliardë euro është nevoja për rimëkëmbje. Barrën më të madhe të dëmeve e mban strehimi me afro 696 milionë euro, për shkak se mijëra banesa u dëmtuan dhe mbetën “pa çati” mbi 17 mijë qytetarë. Bizneset gjithashtu kanë pësuar një goditje të madhe nga fatkeqësia natyrore.
Dëmet e humbjet në sektorin e prodhimit llogariten në 150.4 milionë euro, ku përfshihen biznesi dhe punësimi, turizmi, trashëgimia kulturore, dhe bujqësia. Më pas renditet arsimi, me 72.3 milionë euro dëme e humbje, ku nevojat për rikonstruksionin e institucioneve arsimore janë emergjente dhe të domosdoshme. Infrastruktura është sektori i tretë që ka pësuar dëme të mëdha në vlerën e 33.4 milionë eurove, ku përfshihet infrastruktura komunitare, rrugët, ujësjellës kanalizime, komunikimi, ndërtesat publike, energjia, etj. Fatura në sektorin e mbrojtjes civile është afro 22 milionë euro dhe në fund renditet shëndetësia me afro 10 milionë euro.
Buxheti i shtetit ka në gatishmëri rreth 20 miliardë lekë dhe 165 milionë euro, pa përfshirë donacionet e organizatave jo fitimprurëse, ndërsa shpresa më e madhe është konferenca e donatorëve. Prioritet për qeverinë është nisja e procesit të rindërtimit dhe akomodimi i të pastrehëve në shtëpitë e reja, ndërkohë që paralelisht do të ndërhyhet edhe në institucionet arsimore dhe shëndetësore, duke bërë që fondet e vëna në dispozicion dhe ato që do të sigurohen të kanalizohen në këto qëllime. Për më tepër është gati dhe paketa e masave fiskale për bizneset e prekura nga tërmeti ku përfshihen shtyrjet e pagesës së detyrimeve si dhe përjashtimin nga taksa e pasurisë. Më pas do të prioritizohen nevojat në raport me emergjencën që paraqesin.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.