Faturimi i energjisë së vjedhur – OSSH kërkon penalizime të reja dhe ndryshime në afatet e lëshimit të faturës
Prej vitit 2020, kushdo që vjedh energjinë elektrike penalizohet me ‘gjobë kilovatësh” apo thënë ndryshme , sasia e energjisë e konsumuar në formë të paligjshme, konvertohet në lekë dhe faturohet. Ndërkohë që, së fundmi Operatori i Sistemit të Shpërndarjes ka propozuar pranë Entit Rregullator të Energjisë disa ndryshime në rregulloren për llogaritjen dhe vendosjen e dëmit ekonomik të shkakuar nga ndërhyrjet e paligjshme në sistemin e matjes së energjisë eletkrike. OSSH kërkon që klientët të penalizohen edhe në rast të ndërhyrjeve në sistemin e matjes në bokse kolektive, pra jo vetëm në bokset individuale.
Gjithashtu, OSSH kërkon penalitet edhe për përdoruesit e rrjetit me linjë të dytë në bokse kolektive apo përdoruesit e lidhur në rrjet pa kontratë. Të tjera ndryshime kërkohen edhe në drejtim të afatit të faturimit për energjinë e vjedhur, duke propozuar zgjatjet e lëshimit të faturës nga 7 ditë në 30 ditë. Ndërkaq, në vendim e saj, Enti Rregullator i Energjisë nuk e ka pranuar propozimin për ndërhyrjet në bosket kolektive, teksa ka nisur proceduart për ndryshimin e rregullores në drejtim të afateve të faturimit për nergjinë e vjedhur.
Sipas rregullores, çmimi me të cilin faturohen klientët që vjedhin energjinë elektirke, përllogaritet mbi bazën çmimit mesatar për këh, të blerë për mbulimin e humbjeve në periudhën që do të faturohet dëmi ekonomik, kostot e transmetimit dhe kostot e rrjetit në të cilin është kyçyr përdoruesi për secilën kategori të tij. Rregullorja i jep të drejtë çdo përdorues i rrjetit për t’u ankuar pranë OSSH apo ERE-së, në rast se kundërshton faturën e dëmit ekonomik të vendosur nga OSSH, ose pretendon se kjo e fundit nuk ka ndjekur dhe zbatuar rregulloren. Sipas të dhënave të institutit të statistikave, gjatë periudhës shtator-dhjetor 2020, humbjet jo teknike në shpërndarje, ku futet edhe vjedhja e energjisë u regjistruan në 135,451 Mëh apo 6.7% e energjisë totale në dispozicion.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.