Faturimi i ujit pa matje – Gjebrea: Vetëm 15% e konsumatorëve paguajnë për frymë

85 për qind e konsumatorëve të ujit të pijshëm në kryeqytet paguajnë aq sa m3 harxhojnë, ndërsa vetëm një pjesë e vogël prej tyre paguajnë për frymë, me një matje mestatare 4.5 m3 për individ.  Në një intervistë për TV SCAN, Zv.Drejtoresha e UKT-së, Evis Gjebrea, thekson se ky institucion ka vënë në shina këtë problematikë duke bërë që secili të paguajë atë që i takon, ndërsa shpjegon se kush bën pjesë tek ata qytetarë që paguajnë për frymë.

“Duhet të theksojmë që numri i kontratave për UKT është rreth 250 mijë në total, këtu hyjnë konsumatorët familjarë, privatë, buxhetorë, por kuptohet që numri i konsumatorëve familjar është më i lartë. 15% nga kjo është pa matje, por duhet të theksojmë që rreth 70% të këtij 15 përqindëshi janë kryesisht pallatet e kohës së komunizmit, për të cilat që nga vetë sistemi i ndërtimit është e pamundur vendosja e një ujëmatësi. Kjo për arsye sepse sipas kodit të ujit, vetë konsumatori është ai që duhet të përgatisë vendin për vendosjen e një ujëmatësi. Ndërsa pjesa tjetër janë kryesisht zonat rurale që i përkasin zonave të reja që ne kemi marrë në administrim”, u shpreh Gjebrea.

Gjebra ka paralajmëruar gjithashtu konsumatorët që gjatë sezonit veror të jenë të kujdesshëm dhe të mos shpërdorojnë ujin e pijshëm, pasi në të kundërt do të përballen me masat që parashikon ligji.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.