FCA me rregulla të reja – Britania përgatit listimin e gjigantit të naftës “Saudi Aramco”
Mbikëqyrësi i tregut në Britani ka prezantuar rregulla të reja të listimit, në përpjekje për të tërhequr kompani si Saudi Aramco në Londër. Propozimi i Autoritetit të Mbikëqyrjes Financiare (FCA) vitin e kaluar ngriti dyshimet se qeveria britanike ka influencuar në mbështetjen e listimit të kompanisë shtetërore të energjisë.
Arabia Saudite pritet të bëjë publike 5% të kompanisë në bursat lokale dhe internacionale, përfshirë Londrën dhe New Yorku-n, që do të jetë oferta publike fillestare më e madhe e bërë ndonjëherë dhe që do të rrisë reputacionin e vendit ku do të listohet.
Britania është përpjekur të promovojë pozitën e Londrës si qendër financiare globale, ndërkohë që vendi del nga Bashkimi Europian, megjithatë ligjvënësit britanik kanë pyetur autoritetin e mbikëqyrjes nëse propozimi origjinal për kompanitë e kontrolluara nga shteti mund të dobësojë mbrojtjen e investitorëve.
“Ekziston një përfitim i konsiderueshëm për investitorët nëse emetuesit korporativ bien dakord me këto kërkesa të reja”, deklaroi mbikëqyrësi ndërkohë që shpalosi rregullat. FCA deklaroi se ka bërë disa ndryshime, përfshirë kërkesat që zgjedhja e drejtorëve të pavarur të jetë subjekt i miratimit nga aksionerët e pavarur.
Do të ketë gjithashtu kërkesa për “transparencë në kohë” të transaksioneve mes autoritetit sovran dhe emetuesit.
“Nëpërmjet këtyre rregullave, kur një kompani e kontrolluar nga shteti të listohet këtu, investitorët mund të përfitojnë mbrojtje të ofruar nga listimi premium”, deklaroi FCA.
Një listim premium në Londër kërkon zakonisht bërjen publike të të paktën 25% të aksioneve të kompanive, por nëpërmjet rregullave të reja, mund të ketë listime edhe më të vogla, si kompania e naftës në Arabinë Saudite.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.