FCA mirëpret reformën tatimore – Do të shtojë investimet në SHBA dhe shpërndajë bonuse për punonjësit
Fiat-Chrysler lajmëroi dy vendime që janë bërë të mundura pjesërisht nga reforma tatimore e kaluar në Dhjetor. Kompania bëri të ditur se do të shtojë investimet në operacionet në SHBA si dhe do të japë pagesa speciale për të njohur angazhimet e punonjësve ndaj suksesit të firmës.
Fillimisht, kompania konfirmoi se do të investojë më shumë se 1 miliardë dollarë, për të modernizuar njësinë në Michigan, ku do të prodhojë gjeneratën e re të kamionçinës Ram, duke u zhvendosur nga vendi aktual i prodhimit në Meksikë, në 2020-ën.
Për të mbështetur rritjen e volumit në njësinë në Michigan, do të krijohen 2,500 vende të reja pune.
Së dyti, kompania konfirmoi se do të paguajë bonuse prej 2,000 dollarë, ndaj thuajse 60,000 punonjësve në Shtetet e Bashkuara, përjashtuar lidershipin.
Pagesa, që do jetë në shenjë mirënjohje ndaj punonjësve për angazhimin e tyre, do të bëhet në tremujorin e dytë të këtij viti, dhe do të jetë shtesë bonuseve të zakonta të lidhura me performancën.
Bonusi special do t’i paguhet çdo punonjësi të përshtatshëm të FCA, në operacionet në Shtetet e Bashkuara.
“Këto lajmërime reflektojnë angazhimin tonë ndaj prodhimit në SHBA dhe ndaj punonjësve të dedikuar që kanë kontribuar në suksesin e Fiat-Chrysler”, deklaroi kreu i kompanisë, Sergio Marchione.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.