FDA autorizon trajtimin me AstraZeneca – “Kokteji” me antitrupa do të përdoret për të parandaluar Covid-19
Administrata e Barnave dhe Ushqimeve në Shtetet e Bashkuara autorizoi përdorimin e trajtimit me antitrupa të AstraZeneca për të parandaluar infeksionet e Covid-19 tek individët me sistem imunitar të dobësuar, apo që kanë histori të efekteve anësore nga vaksinat. Trajtimi me antitrupa, Evusheld, është autorizuar vetëm për të rriturit dhe adoleshentët që nuk janë të infektuar me koronaivrus apo që nuk janë ekspozuar së fundmi ndaj një individi të infektuar, sipas agjencisë.
Autorizimi për terapinë, që përbëhet nga 2 antitrupa monoklonalë, tixagevimab dhe cilgavimab, shënojnë një hap të rëndësishëm për AstraZeneca, pasi vaksina e përdorur gjerësisht e kompanisë nuk është miratuar ende nga autoritetet në SHBA. AstraZeneca ra dakord në muajin e kaluar që të furnizojë qeverinë amerikane me 700,000 doza të Evusheld, që sipas studimeve shkurton rrezikun që njerëzit të zhvillojnë covid-19 me simptoma me 77%, sipas provave të fazës përfundimtare. Ndërkohë që vaksinat varen tek një sistem imunitar i pacënuar, që të zhvillojë antiturpat e shënjestruara dhe qelizat që luftojnë infeksionin, Evusheld përmban antitrupa të zhvilluar në laborator që janë projektuar të qëndrojnë në trup për disa muaj dhe të frenojnë virusin në rast të infeksionit.
Terapia e AstraZeneca, e dhënë me 2 injeksione, pritet të zgjasë për disa muaj deri në 1 vit. Edhe pse vaksinat ofrojnë mbrojtjten më të mirë kundër Covid-19, disa individë me sistem imunitar të kompromentuar, apo ata që kanë histori të reaksioneve të forta ndaj një vaksine, kanë nevojë për një mbrojtjte alternativë, sipas Patrizia Cavazzoni, shefe e Qendrës për Hulumtim të Barnave tek Agjencia. Megjithatë, FDA shtoi se parandalimi përpara infeksionit me Evusheld, nuk përbën një zëvëndësues të vaksinimit tek individët për të cilët rekomandohet vaksina e Covid-19.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.