FDA, doza nxitëse për adoleshentët – Pritet t’i miratojë për 12-15 vjeçarët në SHBA

Administrata e Barnave dhe Ushqimeve në Shtetet e Bashkuara, po planifikon javën e ardhshme që të autorizojë një dozë nxitëse të vaksinës së  Pfizer – BioNtech për personat në moshë 12-15 vjeç, sipas New York Times, që përmendi persona me njohuri për çështjen.  Rregullatorët amerikanë planifikojnë gjithashtu të lejojnë si adoleshentët dhe të rriturit, të marrin një dozë shtesë të vaksinës së Pfizer, 5 muaj pas marrjes së një doze të dytë, në vend të periudhës 6 mujore që rekomandohet për momentin.

Ekspertët e shëndetësisë në SHBA paralajmëruan amerikanët se rritja e rasteve me Covid-19, nxitur nga varianti Omicron, kërcënon ndërprerje të mëdha te aktiviteteve, nga shkolla e deri tek bërja e pazarit, si dhe i bënë thirrje që të përgatiten për një muaj sfidues të ardhshëm.  Për të dytën ditë radhazi, Shtetet e Bashkuara shënuan një numër rekord të infeksioneve, bazuar në mesataren 7-ditore, me mbi 290,000 infeksione të raportuara çdo ditë.  Duke mos llogaritur mesataren 7-ditore, që sheshon luhatjet e shfirave,  rastet e reja u rritën me 582 mijë në 24 orët  fundit.

Të paktën 18 shtete dhe Puerto Rico, kanë shënuar numrin më të madh të rasteve që kur nisi pandemia.   Maryland, Ohio dhe Washington, raportuan gjithashtu një rekord të shtrimeve në spitale, ndërkohë që totali për SHBA u rrit me 27%.  Rritja e infeksioneve vjen në një kohë të udhëtimeve për pushime, me festat e Vitit të Ri që priten në vazhdim, dhe ndërkohë që shkollat do përballen me studentët që kthehen pas pushimeve.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.