FED injoron thirrjen e Trump, nuk ndryshon interesat. Powell: Jemi në rrugën e duhur

Rezerva Federale në Shtetet e Bashkuara nuk ndryshoi normën bazë të interesit në takimin e kësaj jave dhe bëri të ditur se nuk do të ndërhyjë në të ardhmen e afërt.   Sistemi bankar qendror theksoi fuqizimin e tregut të punës, rritjen ekonomike dhe mundësinë e rritjes së inflacionit.   Kryetari i  Rezervës Federale, Jerome Powell tha se nuk sheh arsye për të bërë ndonjë lëvizje, pas përfundimit të takimit 2-ditorë.   Politikëbërësit e bankës bënë të ditur se rezultatet më të mundshme janë rritja e vazhduar ekonomike, tregu i fortë i punës dhe rritja e inflacionit.

“Ne kemi parë zhvillimet ekonomike dhe financiare në Shtetet e Bashkuara dhe në të gjithë botën, e kemi vendosur që të mos ndryshojmë normën bazë të interesit.  Rritja ekonomie ndodhet në një nivel të fortë, tregu i punës është fuqizuar dhe pagat po rriten. Inflacioni është ende i ulët, çka na jep mundësinë për të treguar durim, por ne presim që të shkojë drejt 2%-shit së shpejti” tha Powell.

Zyrtarët e bankës ndodheshin nën presion një ditë pasi presidenti Donald Trump i bëri thirrje që të ulin interesat me 0.5% dhe të shtojnë stimujt monetarë.   Banka Qendrore uli normën e interesit që i paguan bankave mbi rezervat e tepërta në 2.35% nga 2.4%,  për t’u siguruar se norma ditore e huadhënies të qëndrojë në fashën objektiv.  Jerome Powell tha se rënia e inflacionit bazë ka ardhur kryesisht nga faktorë tranzitorë dhe shtoi se pret një ringritje drejt objektivit prej 2%.  Për momentin, kryetari i Rezervës Federale tha se inflacioni i ulët po lejon bankën që të tregojë durim ndaj ndryshimeve të normës së interesit, që qëndron në 2.25-2.5%.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.