Fed lëviz sipas projeksioneve – Nuk ndërhyn, pritet rritja e normës bazë të interesit në Shtator
Rezerva Federale në SHBA, mbajti normat e interesit të pandryshuara në takimin e kësaj jave, por e cilësoi ekonominë si të fortë, duke shtuar pritshmëritë për një rritje gjatë Shtatorit. Banka Qendrore deklaroi se ekonomia ka patur performancë të fortë dhe tregu i punës ka vazhduar të fuqizohet, ndërkohë që inflacioni ndodhet pranë objektivit prej 2% që prej takimit të fundit në Qershor.
“Shtimi i vendeve të punës ka qenë i fortë dhe norma e papunësisë ka qëndruar e ulët. Shpenzimet konsumatore dhe investimet fikse të biznesve janë rritur gjithashtu”, deklaroi Fed pas përfundimit të takimit 2-ditor.
Norma bazë e interesit mbeti e pandryshuar në vargun 1.75-2%. Rezerva Federale pret 2 ndërhyrje deri në fund të vitit. Investitorët nuk prisnin një rritje këtë javë, ndërkohë që pritshmëritë qëndrojnë për muajin e ardhshëm dhe Dhjetorin.
Sipas kontratave futures të titujve federalë, shansi për një rritje të interesave në Shtator qëndron në 91% ndërsa për një ndërhyrje tjetër në Dhjetor, në 71%. Reagimi në tregje ishte i limituar ndërkohë që vendimi u përputh me pritshmëritë.
Kryetari i Sistemit Bankar Qendror, Jerome Powell, tha se ekonomia është në pozitë të fortë dhe premtoi se do të vazhdojë tkurrjen monetare graduale.
Ekonomia u rrit me 4.1% në tremujorin e dytë, që është performanca më e fortë në 4 vite, ndërkohë që shpenzimet konsumatore u rritën dhe fermerët kanë shtuar dërgesat e sojës përpara se Kina të vendoste tarifa në këtë produkt. Inflacioni ka nisur rritjen pas 6 vitesh poshtë nivelit objektiv të bankës qendrore. Treguesi i preferuar mbi inflacionin i bankës, indeksi i shpenzimeve personale për konsum (PCE), që përjashton ushqimin dhe energjinë, u rrit në 2% gjatë tremujorit të dytë. Kostot e punës në SHBA treguan gjithashtu rritjen më të madhe që prej vitit 2008.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.