FED nuk surprizon – Rrit normën e interesit, Yellen i lë “detyrë” inflacionin kryetarit të ri
Rezerva Federale në Shtetet e Bashkuara rriti normën bazë të interesit në takimin e muajit Dhjetor, por la perspektivën për vitet e ardhshme të pandryshuar. Politikëbërësit projektuan një rritje në afat-shkurtër të ekonomisë prej propozimeve të administratës Trump për uljet tatimore.
Komisioni Federal i Tregut të hapur argumentoi se reforma tatimore do të nxisë rritjen ekonomike në vitin 2018, por norma potenciale e rritjes në afat-gjatë do të tërhiqet përsëri në 1.8%. Shtëpia e Bardhë ka bërë të ditur prej kohësh se plani tatimor do të prodhojë një rritje ekonomike prej 3-4%.
Pritshmëritë për stimuj fiskalë i dhanë liri veprimi sistemit bankar qendror në SHBA që të rrisë normën e interesit me 0.25% në një segment prej 1.25-1.5%, duke sjellë ndërhyrjen e tretë të bankës për këtë vit. Megjithatë, projeksionet e Rezervës Federale për 3 rritje në vitet 2018-2019 mbetën të pandryshuara, duke treguar se reforma tatimore do të ketë një efekt modest.
Kjo solli edhe rënien e dollarit amerikan ditën e djeshme. Lëvizja e fundit pasqyroi një fitore për bankën qendrore që ka hasur vështirësi për të mbajtur premtimin në lidhje me tkurrjen monetare në të shkuarën. Kjo solli gjithashtu fjalimin e fundit të kryetares së bordit të guvernatorëve, Janet Yellen,
“Momentalisht, ekonomia e Shteteve të Bashkuara po performon mirë. Rimëkëmbja që po ndjekin nuk është bazuar në themele të paqëndrueshëm si rritja e madhe e botxhit. Ekonomia globale ndodhet gjithashtu në vrull dhe rritja është e sinkronizuar në të gjithë botën”, thaJanet Yellen duke shprehur optimizëm mbi perspektivën.
Megjithatë, mbeten ende disa sfida për kryetarin e ri Jerome Poëell. FED pret një rritje të fortë ekonomike, papunësi të ulët dhe lëvizje të dobëta në nivelin e çmimeve. Yellen tha se niveli i ulët i inflacionit, poshtë objektivit të bankës prej 2%, përbën një nga punët e papërfunduara, që do t’ia lë kryetarit të ri për ta zgjidhur. Tregjet e kapitalit në SHBA patën rritje pas vendimit të bankës, ndërsa yield-et e titujve të Thesarit ranë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.