“Fed s’ka arsye për panik” – “Moody’s”: Ekonomia nuk justifikon uljen e normave të interesit
Agjencia Moody’s bëri të ditur se të dhënat ekonomike në SHBA nuk justifikojnë uljen e normave të interesit nga Rezerva Federale, pavarësisht thirrjeve ndaj bankës për ta bërë. Këshilltari kryesor ekonomik në Shtëpinë e Bardhë, Larry Kudlow, tha javën e kaluar se banka qendrore duhet të ulë menjëherë interesat me 0.5%. Komentet e tij u ndoqën nga analistë të tjerë, përfshirë Stephen Moore që presidenti Donald Trump kërkon t’i caktojë një post te Rezerva Federale.
Banka Qendrore vendosi në takimin e fundit të politikave monetare që të ndalojë tkurrjen monetare, ndërkohë që uli projeksionet për rritjen ekonomike dhe inflacionin dhe paralajmëroi për perspektivën në Europë dhe Kinë. “Ndërkohë që ekonomia e Shteteve të Bashkuara po rritet me një ritëm më të ngadaltë, të dhënat ekonomike nuk justifikojnë uljen e normave të interesit”, deklaroi Moody’s.
Sipas agjencisë, nuk ka arsye se pse Rezerva Federale të futet në panik. Ekonomia amerikane është ende e fortë, punësimi ndodhet në nivelin më të ulët në 50 vite, pagat janë rritur shpejtë, inflacioni është pranë objektivit prej 2% dhe tregu i aksioneve pritet të shënojë nivele rekord përsëri. Sipas Moody’s, ulja e normave të interesit në këtë fazë do të ishte kundër-produktive, për shkak se lëvizja do të inkurajonte rritjen e borxhit në ekonomi.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.