Fëmijët me aftësi ndryshe – Klosi: Jo vetëm të trajtohen por dhe të aftësohen për punë
Si deputet i qarkut të Beratit, në këtë prag festash, ministri Blendi Klosi u ndal në qendrën e zhvillimit në Berat, ku strehohen 27 fëmijë me aftësi ndryshe, të grup moshave të ndryshme të cilëve iu shpërndau disa dhurata duke nënvizuar se sa e rëndësishme është t’u falësh dashuri këtyre fëmijëve.
“Kjo është për ti dhënë dashuri atyre njerëzve që kanë më shumë nevojë për dashurinë e shoqërisë, për dashurinë e shtetit, për dashurinë e njerëzve që mund të ndajnë me ta një festë kaq të bukur sa festat e vitit të ri”- tha ministri Klosi.
Ai gjithashtu theksoi rëndësinë jo vetëm të trajtimit me dashuri të fëmijëve dhe njerëzve në nevojë, por edhe të mundësive që i duhen krijuar atyre për të qenë të aftë për punë, megjithëse me nevoja të veçanta.
“Shkolla profesionale këtu në Berat trajton dhe trajnon disa nga fëmijët me aftësi të kufizuar për ti bërë atyre të mundur që të hyjnë në tregun e punës” – u shpreh ministri Klosi.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.