Femrat, të diskriminuara. Në BE paguhen 16% më pak se meshkujt
Diferenca në paga mes meshkujve dhe femrave në Bashkimin Europian vazhdon të jetë e theksuar pavarësisht progresit të regjistruar gjatë viteve të fundit. Në vendet e unionit, femrat paguhen sa 84% e meshkujve, për të njëjtën punë.
Pra, për çdo 1 euro që fiton një mashkull, femrat, për të njëjtën punë, paguhen vetëm 84 cent. Vendet që gëzojnë barazinë më të madhe gjinore në punë, të paktën sa i përket pagesës, janë Italia dhe Luksemburgu, ku hendeku në paga fiksohet në vetëm 5.5%. Pabarazia më e madhe ndërkohë regjistrohet në Estoni, në 26.9%, në Republikën Çeke, 22.5%, Gjermani, 22%, Austri 21.7%, dhe Mbretëri e Bashkuar, 20.8%. Këtë gjë e ilustron edhe kjo hartë, ku diferencat brenda Europës janë mjaft të mëdha.
Krahasuar me vitin 2010, hendeku gjinor në paga është ngushtuar ndjeshëm në pjesën dërrmuese të vendeve të unionit. Progresin më të ndjeshëm e raporton Belgjika, ku nga 10.2% në vitin 2010, diferenca ka zbritur në 6.5%. Edhe në Hungari, Luksemburg, Rumani dhe Finlandë ka një rënie, me rreth 3.5% në harkun e 5 viteve.
Por, njëkohësisht, pa barazia është rritur në 10 vende anëtare. Në Slloveni, nga 0.9% në 2010, në 8.1% në 2015-ën, si dhe në Portugali me rreth 5%. Mesatarja në Bashkimin Europian ndërkohë fiksohet në 16%. Në Maqedoni ndërkohë, diferenca në paga zbret në 9%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.