Festat, 40% më shumë udhëtime – Vathi: Biletat, numër më i lartë shitjesh se në dhjetor 2016
Edhe pse vendi ynë ka ndër çmimet më të larta të biletave dhe kjo për shumë arsye, kjo nuk i ka penguar qytetarët shqiptar të zgjedhin për të kaluar festat e fundvitit jashtë kufijve. Nënkryetari i Unionit të Operatorëve Turistik, Besnik Vathi, shprehet për televizionin SCAN se numri i biletave të shitura gjatë muajit dhjetor 2017 ishte 30 deri në 40% më i lartë se e njëjta periudhë e një viti më parë pavarësisht rritjes së çmimit .
“Në përgjithësi si mesatare, çmimet tek ne janë shumë më të larta se në vendet e tjera, pra duke operuar me mesataren. Po të nisemi me data të caktuara, kuptohet që mund të gjesh çmime edhe tek ne më lirë se sa diku tjetër, por bëhet fjalë për një mesatare, për një lëvizje që i referohet jo thjesht kërkesë-ofertës, por i referohet kostove që ka një kompani ajrore në Shqipëri, në raport me kostot që ka në vendet e tjera. Rritjet në sezon janë përgjithësisht 30-40%”, tha Vathi.
Veçantia e vitit 2017 sipas Vathit ka qenë ofrimi i paketave për të gjitha kategoritë duke mundësuar udhëtime edhe me buxhete të ulëta.
“Një rritje ka ardhur ndoshta edhe për shkak të ofertës shumë më të madhe të zgjerohet, pra të ofrohet jo thjesht për buxhete të larta, por edhe për buxhete të ulëta. Pra, për të ofruar dhe krijuar mundësinë një shtrese sa më të madhe klientele”, shtoi Vathi.
Sipas operatorëve turistikë, një ndër destinacionet më të kërkuara vijon të mbetet Greqia dhe kjo për faktin se çmimet janë më të lira. Vathi theksoi se risi për 2018-ën do të jetë Australia krahas Tailandës dhe Kinës të cilat u futën si destinacione për herë të parë në 2017-ën.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.