FIFA merr $201 mln nga paratë e vjedhura – Departamenti i Drejtësisë në SHBA shpërndan paratë e sekuestruara
FIFA, organi drejtues i futbollit botëror, do të marrë 201 milionë dollarë në kompensim për humbjet e pësuara nga skemat e korrupsionit në futboll. Deklarata u bë nga Departamenti i Drejtësisë në Shtetet e Bashkuara të Amerikës. Paratë janë sekuestruar nga llogaritë bankare të ish-zyrtarëve, të cilët ishin përfshirë në skema korrupsioni dhe që më pas u ndoqën penalisht, pas një hetimi në shumëvjeçar në futbollin botëror.
Që kur Departamenti i Drejtësisë zbuloi korrupsionin në vitin 2015, më shumë se 50 të pandehur janë akuzuar penalisht. 27 persona dhe 4 subjekte korporative janë shpallur fajtorë, ndërsa dy persona janë dënuar në gjyq. “Njoftimi i sotëm konfirmon se paratë e vjedhura nga zyrtarët e korruptuar të futbollit dhe nga drejtuesit e marketingut sportiv, përmes mashtrimit dhe lakmisë, do të kthehen aty ku e kanë vendin dhe do të përdoren në mërnyrë që sporti të përfitojë”, deklaroi Prokurori i Nju Jorkut, Jacquelyn Kasulis.
Departamenti i Drejtësisë në SHBA njoftoi se 32.3 milionë fonde të sekuestruara janë miratuar tashmë për t’ju shpërndarë FIFA-s dhe CONCACAF, që është Konfederata Përgjegjëse për Futbollin në Amerikën veriore dhe Qendrore, për CONMEBOL, që përfaqëson futbollin në Amerikën e Jugut, dhe për federata të ndryshme.
“Jam i kënaqur kur shoh që paratë e përfituara në mënyrë të paligjshme tani po kthehen për t’u përdorur për qëllimet e duhura”, deklaroi Presidenti i FIFA-s, Gianni Infantino. Sipas ligjit amerikan, Departamenti i Drejtësisë ka autoritetin të shpërndajë të ardhurat nga asetet e konfiskuara për ata që kanë qënë viktimë e këtyre krimeve, përfshirë edhe organizatat e futbollit që u mashtruan.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.