Figurat e profilit të lartë të Rusisë që po japin dorëheqjen dhe refuzojnë të mbështesin luftën!
Dorëheqja e një zyrtari të lartë të qeverisë ruse dhe shpërngulja e tij e raportuar jashtë vendit nuk ishte largimi i parë vullnetar i një personi nga një punë shtetërore që nga fillimi i luftës së Rusisë me Ukrainën, por sigurisht ishte një nga më të habitshmet.
Anatoli Chubais, i cili ishte i dërguari i Presidentit Vladimir Putin në organizatat ndërkombëtare për zhvillimin e qëndrueshëm, është i njohur në Rusi. Ai mbajti poste të profilit të lartë për gati tre dekada, duke filluar nga Boris Yeltsin, lideri i parë post-sovjetik.
Një numër i figurave publike kanë dënuar pushtimin e Ukrainës dhe kanë lënë postet e tyre në institucionet dhe kompanitë shtetërore, gjë që mund të sinjalizojë ndarje në radhët zyrtare të Rusisë për shkak të luftës. Deri më tani nuk ka pasur indikacione se dorëheqjet kanë arritur në rrethin e brendshëm të Putin.
Një pjesë e vogël e largimeve erdhën pasi Putin kritikoi ata që kundërshtonin kursin e tij si “llum dhe tradhtarë”, të cilët shoqëria ruse do t’i pështynte “si mushkonja”. Disa nga figurat e profilit të lartë që i kanë kthyer shpinën Kremlinit për shkak të luftës:
ANATOLY CHUBAIS
Të mërkurën, Kremlini konfirmoi raportet e mediave për dorëheqjen e Chubais, 66 vjeç, i cili ishte arkitekti i fushatës së privatizimit të Jelcinit. Raportet, duke cituar burime anonime, thanë se ai dha dorëheqjen për shkak të luftës. Ai nuk e ka komentuar publikisht dorëheqjen e tij.
ARKADY DVORKOVICH
Arkady Dvorkovich dikur shërbeu si zëvendëskryeministër i Rusisë dhe aktualisht është kryetar i Federatës Ndërkombëtare të Shahut, ose FIDE. Ai kritikoi luftën me Ukrainën në komentet e bëra për revistën Mother Jones më 14 mars dhe u vu nën kritika nga partia në pushtet e Kremlinit.
LILIA GILDEYEVA
Lilia Gildeyeva ishte një spikere për një kohë të gjatë në kanalin NTV të financuar nga shteti, i cili për dy dekada ka ndjekur me kujdes linjën e Kremlinit. Ajo la punën dhe u largua nga Rusia menjëherë pas pushtimit.
ZHANNA AGALAKOVA
Zhanna Agalakova ishte gazetare për një tjetër kanal televiziv shtetëror, Channel One, duke kaluar më shumë se 20 vjet atje dhe duke punuar si spikere dhe më pas korrespondente në Paris, Nju Jork dhe vende të tjera perëndimore. AP
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.