Fillojnë “detyrat” për Shqipërinë – 6 rekomandimet e BE, reforma për integrimin
Vendet e Ballkanit Perëndimor dhe Turqia kanë ranë dakord unanimisht të përshpejtojnë reformat ekonomike dhe sociale për të forcuar stabilitetin makroekonomik dhe për të nxitur konkurrueshmërinë, si dhe zhvillimin gjithëpërfshirës.
Kjo është përcaktuar në Dialogun vjetor Ekonomik dhe Financiar me Bashkimin Europian. Palët miratuan së bashku konkluzionet që përfshijnë udhërrëfyes politikë specifikë sipas vendeve, bazuar në Programet e Reformës Ekonomike të 7 vendeve të Ballkanit Perëndimor dhe Turqisë, mes të cilave 5 janë vende kandidate dhe 2 potencialisht kandidate vendeve.
“Jam i lumtur që këto vende kanë treguar angazhim ndaj këtij ushtrimi, që është një objektiv themelor i strategjisë së zgjerimit të BE-së. Fokusi tani është te zbatimi i reformave, në mënyrë që popujt e rajonit të shohin vende pune më të shumta dhe më të mira”, tha Johannes Hahn, Komisioner për Politikat Evropiane të Fqinjësisë dhe zgjerimit.
Sa i përket vendit tonë, Komisioni Europian jep 6 rekomandime, për të cilat qeveria Shqiptare është dakordësuar që do ti ndërmarrë.
Së pari, Brukseli flet për vazhdimin e konsolidimit fiskal, me qëlimin madhor për të ulur borxhin publik, e nëse nevojitet, të merren masa shtesë.
Së dyti, mbledhja më e mirë e taksave dhe zgjerimi i bazës së taksave.
Së treti, adresimin e kredive me probleme dhe rritjen e përdorimit të Lekut. Në këtë pikë rekomandohet, edhe rritja e kompetencave të AMF.
Së katërti, Shqipëria angazhohet të sigurojë ndarjen e plotë të aktiviteteve të transmetimit dhe shpërndarjes së sektorëve të energjisë elektrike dhe gazit.
Së pesti, të vazhdojë proceset e sqarimit të pronësisë së tokës bujqësore dhe regjistrimin e pronës, si dhe të krijojë një kadastër funksionale gjithëpërfshirëse dhe një e-kadastër deri në vitin 2019.
Së fundmi, të rrisë kapacitetet e shërbimeve të punësimit dhe sigurimin nga ana e tyre të masave aktive për tregun e punës për të papunët dhe joaktivët.
Në këtë pikë, Shqipëria angazhohet që në fund të këtij viti, të fillojë të hartojë plane konkrete për të adresuar problematikën e punës së padeklaruar.
Sa i përket programit ekonomik të vitit të kaluar, Brukseli nënvizon se, është zbatuar pjesërisht.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.