Fillojnë uljet në SHBA, dyndje nëpër dyqane

Në Shtetet e Bashkuara të Amerikës kanë filluar uljet sezonale, dhe për rrjedhojë edhe dyndjet nëpër dyqane. Njerëzit kërkojnë të shfrytëzojnë uljet e pas Krishtlindjeve për të bërë blerjet e tyre, si dhe dhuratat e festave.

Shitësit ndërkohë, shprehen se, veshjet janë blerjet më të preferuara në këtë periudhë të vitit. “Fantastike, brilante, është si një shishe shampanjë. Vërtet shumë mirë, dhe sidomos uljet e çmimeve sot te Marcys”, shprehet një turiste në New York.

Uljet e çmimeve filluan prej ditës së Hënë, pra të nesërmen e festës së Krishtlindjes. Dyndjet nëpër dyqane në orët e pasdites ndërkohë nuk e kanë bërë të lehtë për qytetarët që të lëviznin lirshëm nëpër dyqane.

“Po fillon të popullohet shumë. Nuk ishte kështu në mëngjes, ishte qetë, por tani situata po vështirësohet”, deklaron një blerës. Një pjese e madhe e dyqaneve, filluan uljet e çmimeve online që prej datës 25 Dhjetor.

Nga ana tjetër, autoritetet vlerësojnë se norma e kthimit të mallrave të blera është në rritje me 10% gjatë këtij viti.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.