Fillon puna për 500 mln euro – Reuters: Qeveria i ka dërguar propozimin bankave, emetimi në Tetor

Qeveria shqiptare i ka dërguar një kërkesë-propozim bankave për emetimin e eurobondit. Synimi është që të mbledhë rreth 500 milionë euro, me një afat maturimi nga 5 deri në 10 vite. Të paktën kjo është ajo që shkruan agjencia e lajmeve Reuters.

Shqipëria, shkruan më tej gjigandi mediatik, synon që të blejë një pjesë të borxhit të vjetër, që pritet të maturohet në vitin 2020.  Afati i fundit i propozimeve është caktuar data 10 Korrik.

Operacioni i emetimit të Eurobondit të ri parashikohet që të kryhet në muajin Tetor të këtij viti, shton më tej Reuters, duke i`u referuar burimeve brenda Ministrisë së Financave. Kjo praktikë është e ngjashme me atë të vitit 2015, kur qeveria shqiptare rinovoi borxhin e vjetër duke shtuar edhe 150 milionë euro të tjera, me një normë interesi në 5.75%.

Lëvizja është pjesë e strategjisë afat-mesëm të Ministrisë së Financave dhe nga ana tjetër pritet të mos ketë ndikim në nivelin e borxhit publik të vendit tonë. Obligacionet tregohen aktualisht me 109.48 dhe me yieldin në 1.62%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.