Filtri i smogut që mund të bëjë punën e afro 300 pemëve: Redukton 240 ton CO2 në vit!

Quhen Pema e qytetit dhe që tani mund të gjenden në qendra si Oslo, Hamburg, Paris, Dresden dhe Londër, nuk janë bimë të vërteta, por panele teknologjike të krijuara me qëllim thithjen e smogut. Ky filtër urban duket se është në gjendje të reduktojë 240 ton dioksid karboni në vit (ekuivalenti në emetimet e ndotjes së prodhuar nga 417 makina) duke reduktuar efektet e dëmshme të krijuara nga PM10,10,10, oksidi i azotit, ozoni dhe grimcat. Sa bimë mund të bëjnë punën e përshkruar në një pemë të vetme të qytetit? Mbi 275 pemë.

‘Pemët e qytetit’ nuk duken si pemë: ato janë panele të mëdha, shpesh të pajisura me një stol. Produktet kryesore të startup-it gjerman Greencity Solutions, i krijuar në Dresden në vitin 2014, u shfaqën për herë të parë në Jena dhe Oslo në vitin 2015. Prodhuesit përcaktojnë City Trees si “filtri i parë bioteknologjik kundër ndotjes në botë”.

Më saktë, këto janë module myshku të integruara në panele vetë-mbështetëse, me një sistem të automatizuar vaditjeje dhe ajrimi: këto “pemë” – si modelet e tyre të jetesës – janë plotësisht të pavarura dhe kërkojnë vetëm disa orë mirëmbajtje në vit.

Ato nuk shërbejnë vetëm për të përmirësuar cilësinë e atmosferës urbane, por edhe për të luftuar praninë e ishujve të nxehtësisë, një nga efektet e ngrohjes globale që do të prekë më shumë qytetet e mëdha. ‘Pema e qytetit’ ka përmasa të vogla, veçanërisht duke pasur parasysh se ajo kryen punën e pothuajse 300 pemëve: çdo panel është 3 metra i gjatë, 4 metra i lartë dhe 60 centimetra i thellë.

Si funksionojnë panelet e startup-it

Të mbjellat e myshkut kapin dioksidin e azotit, gazrat e ozonit dhe pluhurin e pranishëm në ajër falë energjisë elektrike të furnizuar nga panelet diellore, ndërsa për ujitjen e bimëve të saj pajisja përdor ujin e shiut të cilin e ruan në një rezervuar.

Nëpërmjet disa sensorëve, ‘Pema e qytetit’ monitoron lagështinë e tokës, temperaturën dhe cilësinë e ujit. Secila prej këtyre pajisjeve bioteknologjike filtron afërsisht 82% të pluhurit të imët në ajër drejtpërdrejt përmes myshkut, të cilin sistemi është në gjendje ta ftohë deri në 2,5 ° C.

Panelet duhen vetëm 8 orë për t’u montuar dhe çdo pjesë kushton rreth 20,000 euro. Dhe ende duke përdorur myshk si filtër, Greencity po lançon gjithashtu Wallbreeze, një mur i tërë që mund të bëhet një alternativë e vlefshme për rikonstruksionin e ndërtesave.

Një projekt i kontestuar

Shkencëtarët kanë vënë në dyshim efektivitetin e CityTrees, sepse gazrat e shkarkimit të automobilave shpërndahen vertikalisht në disa kilometra. Prandaj, zgjidhja kryesore është dhe mbetet gjithmonë zbutja e emetimeve urbane, për shembull nëpërmjet përmirësimit të transportit publik, promovimit të automjeteve elektrike apo të energjisë së pastër e ndërhyrjeve në ndërtesa. Wired

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.