Financimi i fermerëve – Në fund të muajit VKM-ja, matrikullimi i bagëtive kusht për përfitim
Aplikimet e fermerëve për të përfituar nga skemat mbështetëse në bujqësi pritet të hapen në muajin Shkurt, pasi vendimi i qeverisë që detajon skemat dhe masën e përfitimit për secilën kategori, pritet të miratohet në fund të këtij muaji.
Ndër risitë e skemës për këtë vit, është fakti që do t’i jepet përparësi bashkimit të fermerëve në kooperativa si dhe matrikullimit të bagëtive.
Ministria e Bujqësisë u ka bërë apel blegtorëve që të matrikullojnë bagëtitë, për efekt sigurie dhe detyrimi ligjor, ndërsa është edhe kushti i domosdoshëm për përfitimin nga skemat mbështetëse.
Gjatë këtij viti, fermerët do ta kenë më të thjeshtë të përfitojnë, pasi skema ka pësuar lehtësim dhe reduktim të burokracive. Për të aplikuar në Skemat Kombëtare 2018, nuk nevojiten dokumenta, pasi procedura është thjeshtëzuar, duke u dhënë mundësinë fermerëve të aplikojnë online.
Faza e parë e aplikimit do të realizohet mbi bazën e vetëdeklarimit nga ana e aplikantit për të dhënat e kërkuara nga formulari i aplikimit i cili gjendet online. Aplikimi bëhet i mundur përmes portalit qeveritar e-albania.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.