Financimi nga qeveria për agroturizmin – Përfitojnë edhe jashtë “100 fshatrave”. Ulet kriteri i numrit të dhomave
Qeveria ka miratuar disa ndryshime në programin e financimeve për bujqësinë dhe zhvillimin rural, që prekin individët që duan të investojnë në agroturizëm.
Tashmë mbështetja për ngritjen apo rikonstruksionin e ambienteve për veprimtari të turizmit rural, si dhe për mbështetje për investime në agroturizëm, do të konsiderohen edhe investime jashtë listës së “100 fshatrave”.
Kombinuar me lehtësitë në paketën e re fiskale për subjektet e agroturizmit, kjo do të krijojë një klimë më të mirë për zhvillimin e këtij modeli biznesi në zonat rurale.
Ndryshimet në VKM prekin edhe kriteret për përfitimin nga mbështetja me fonde. Nëse më parë për të përfituar deri në 1.5 milionë lekë, ambientet e agroturizmit duhet të kishin 6 deri në 10 dhoma, me ndryshimin e ri numri minimal i dhomave ulet në 4.
Ndryshimi tjetër prek kategorinë për investime në agroturizëm kundrejt planit të biznesit. Mbështetja maksimale në vlerën e 50% të totalit të faturave tatimore tashmë ulet në 10 milionë lekë, nga 20 milionë lekë sipas vendimit të mëparshëm. Kjo ulje e vlerës maksimale të mbështetjes financiare do të mundësojë që të përfitojnë një numër më i madh subjektesh të agroturizmit.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.