Finlanda kundër reformës – I thotë jo ministrisë së financave të Eurozonës
Finlanda ka dalë haptazi kundër idesë së një ministrie të përbashkët financash për Eurozonën si dhe atë të një buxheti të përbashkët.
Këtë e deklaroi vetë qeveria e vendit skandinav, duke i dhënë goditjen e parë propozimit të Emmanuel Macron, për të reformuar Eurozonën. Finlanda udhëhiqet nga një koalicion i qendrës së djathtë dhe në krye të saj është një ndër biznesmenët më të suksesshëm të vendit.
Qeveria e drejtuar nga Juha Sipila, deklaroi se është në favor të gjitha reformave që mbështesin rritjen e disiplinës brenda rajonit të monedhës së përbashkët, sesa ato që krijojnë përgjegjësi të reja mes vendeve anëtare.
“Finlanda nuk sheh asnjë arsye për krijimin e institucioneve të reja, si ato të një ministrie të përbashkët financash, por i konsideron institucionet aktuale si të mjaftueshme”, thuhet në deklaratë.
Finlanda ka tendencën të ndjekë linjën e Gjermanisë brenda Bashkimit Europian.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.