Firma kineze hap minierën në Serbi – Do ta bëjë Serbinë prodhuesin e dytë më të madh të bakrit në Europë

Firma kineze e minierave Zijin, ka nisur operacionet në një minierë të re serbe të bakrit dhe arit, ç’ka pritet ta bëjë shtetin ballkanik prodhuesin e dytë më të madh të bakrit në Europë.  Zona e sipërme Cukari Peki e projektit të arit dhe bakrit Timok, është pjesë e kompleksit të vetëm serb të bakrit, RTB Bor, që zotërohet nga kinezja Zijin.

Firma ka investuar 474 milionë dollarë deri më tani në minierën e re, që pritet të ketë një kapacitet vjetor prej 3.3 milionë ton minerale. “Pjesa e parë e projektit përfshin një masë shkëmbore të gradës ultra të lartë që përmban minerale, që pritet të prodhojë 50,000 ton bakër dhe 3 ton ar në vitin 2021”- sipas një deklarate të kompanisë.  Me hapjen e zonës së ulët të projektit Timok, përqindja e prodhimit total të bakrit serb në Europë mund të rritet në 18% nga 5%, që sipas ministrisë do ta bëjë Serbinë prodhuesin e dytë më të madh në kontinent pas Polonisë.

“Ky projekt ështëe i rëndësishëm për zhvillimin e ekonomisë serbe dhe gjithashtu për fuqizimin e bashkëpunimit mes Serbisë dhe Kinës” – tha ambasadori kinez në Serbi, Chen Bo. Në vitin 2018, Zijin u bë partner strategjik i kompleksit serb të minierave RTB Bor, duke premtuar të investojë 1.26 miliardë dollarë në këmbim për 63% të pronësisë.  Kina ka investuar deri më tani miliarda euro në Serbi, kryesisht në formën e kredive të buta për të financuar autostrata dhe projekte të energjisë, në iniciativën e ashtuquajtur “brez dhe rrugë”.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.