Firmat e Brokerimit te licensuara nga AMF, interes për zhvillimin e tregut vendas të kapitaleve! Takim informues në ambientet e Bursës Shqiptare të Titujve
Shoqëritë komisionere të licencuara nga Autoriteti i Mbikëqyrjes Financiare në Shqipëri shfaqin interes për zhvillimin e tregut vendas të kapitaleve. Drejtori Ekzekutiv i Bursës Shqiptare të Titujve ALSE, Artan Gjergji zhvilloi një takim pune me firmat e brokerimit ku u diskutua mbi mundësitë e bashkëpunimit në ndërmjetësimin në industrinë e titujve dhe kushtet e anëtarësimit të këtyre firmave të brokerimit pranë Bursës Shqiptare të Titujve ALSE.
Përfaqësuesit e “Aksioner International Securities Brokerage”, “Eurotrade Securities”, “Prodata Securities” dhe “ Smartcom Financial Broker” u informuan në lidhje me punën e bërë nga Bursa për vënien në funksion të institucionit, për harmonizimin e sistemeve elektronike me Bankën e Shqipërisë dhe sistemin e pagesave në vend. Po ashtu, firmat e brokerimit u informuan për kuadrin rregullativ të Bursës, rregulloret dhe kriteret e anëtarësimit të këtyre ndërmjetësve financiare në Bursë, që të fillojnë aktivitetin për llogari të tyre dhe klientëve të tyre që duan të tregtojnë tituj në Bursë. Gjithashtu, përfaqësuesit e firmave u informuan në lidhje me komisionet e tarifat si dhe me benefitet e anëtarësimit deri në fund të këtij viti si dhe me pritshmëritë e Bursës për zhvillimin e tregut në periudhë afatmesme dhe afatgjatë, duke filluar me tregtimin e titujve të qeverisë e deri tek listimi i titujve të korporatave (aksioneve apo obligacioneve të korporatave). Firmat e brokerimit u njohën edhe me kriteret e listimit të bizneseve në bursë etj.
Vetë firmat e brokerimit bënë një prezantim të punës së tyre aktuale me ndërmjetësimin e klientëve shqiptarë në tituj, të listuar dhe kuotuar në bursat jashtë vendit, si dhe shfaqen interes për zhvillimin e tregut vendas të kapitaleve. Gjithashtu, ata u treguan të gatshëm që një pjesë të aktivitetit të tyre ta lidhin edhe me tregun vendas të titujve.
Pas këtij takimi, Bursa Shqiptare e Titujve ALSE do të vijojë takimet informuese dhe bashkëpunuese me bankat e nivelit të dytë në vend, të licencuara nga AMF për të tregtuar në tituj të borxhit të qeverisë (bono dhe obligacione thesari).
Bursa Shqiptare e Titujve ALSE është e para bursë me kapital privat e licencuar në vend. Bursa u licencua në korrik të këtij viti nga Autoriteti i Mbikëqyrjes Financiare dhe brenda vjeshtës pritet të nisë punën zyrtarisht. Fillimisht bursa do të tregtojë tituj qeveritarë, ndërsa në një fazë të dytë do të nisë edhe tregtimin e titujve të tjerë si aksione, obligacionesh korporatash, etj.
Lindja e bursës është pritur me entuziazëm si nga bizneset, ashtu edhe nga institucionet shtetërore, pasi pritet të ketë një impakt pozitiv për investimet afatgjata dhe zhvillimin ekonomik të vendit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.