Firmat e teknologjisë, përballë pandemisë, Gentiloni: Janë fituesit e krizës. Duhet të paguajnë më shumë taksa
Gjigantët e teknologjisë duhet të paguajnë taksa të mëdha në Europë, veçanërisht pasi janë “fituesit” e krizës së koronavirusit, sipas zyrtarit të lartë europian, Paolo Gentiloni. Komentet e tij vijnë pas një konflikti mes SHBA dhe BE mbi taksimin e kompanive si Apple, Google dhe Amazon.
“Kjo përbën një problem të madh”,- tha Paolo Gentiloni, komisioneri europian për ekonominë dhe taksimin. Megjithatë, ish/kryeministri italian shtoi se nuk duhet pranuar më ideja që këto gjigant, fituesit e krizës, të mos paguajnë taksa mjaftueshëm në Europë. Në vitin 2018, Komisioni Europian, propozoi një taksë prej 3% për shërbimet dixhitale, duke argumentuar se sistemi tatimor duhet të përidtësohet për epokën e re. Megjithatë, Shtëpia e Bardhë bëri të ditur se taksa dixhitale është e padrejtë dhe shënjestron firmat amerikane.
Gjatë asaj kohe, Komisioni deklaroi se kompanitë dixhitale paguajnë mesatarisht një normë efektive tatimore prej 9.5%, krahasuar me 23.2% për bizneset tradicionale. Megjithatë, në fillim të pandemisë, sektori i teknologjisë mori një nxitje, ndërkohë që shumë konsumatorët e përdorën për video-konferenca, blerje në rrjet dhe socializim. “Gjigantët e platformave dixhitale janë fituesit e vërtetë nga kriza, në pikëpamjen ekonomike”,- tha Gentiloni.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.