Firmoset marrëveshja trepalëshe e Air Albania – Balluku: Do të certifikohet nga AAC brenda një jave ose dhjetë ditëve

Është firmosur ditën e sotme marrëveshja trepalëshe financiare e Air Albania, e cila i hap rrugë certifikimit të saj nga Autoriteti i Aviacionit Civil. Në një deklaratë për mediat, ministrja e Infrastrukturës dhe Energjisë, Belinda Balluku ka konfirmuar se certifikimi i kompanisë ajore Air Albania pritet të kryhet brenda një jave ose 10 ditëve nga AAC.

“Air Albania ka kaluar nëpër fazat që kërkohet për t’u certifikuar. Prej disa kohësh është punuar për të kaluar fazën e trajnimeve, për të konsoliduar fazën e testimeve teknike, për të prodhuar të gjitha letrat dhe manualet të cilat çojnë drejt certifikimit dhe për të arritur sot për të konkluduar sot marrëveshjen financiare mes palëve e cila hap dritën jeshile për certifikimin e kësaj kompanie nga Autoriteti i Aviacionit Civil , gjë që do të ndodhë në ditët në vazhdim, brenda një javë apo 10 ditëve.”

Ndërkohë, drejtori i Turkish Airlines, Ilker Aycii, i cili ka ardhur sot në Tiranë për të firmosur marrëveshjen fianciare, u shpreh se ka përfunduar përgatitja e procesit teknik dhe së shpejti Air Albania ‘do të jetë në qiell.’

“Përgatitja e procesit teknik është kryer tanimë dhe pothuajse jemi duke përfunduar procesin për të përmbyllur projektin. Air Albania shumë shpejt do të jetë në qiell dhe shumë krenar ne po punojmë së bashku me palën shqiptare si Tukrish Airlines dhe infrastruktura është gati dhe siç kemi parë, procesi teknik është punuar me shumë kujdes. Tani ne jemi gati dhe së shpejti do të jemi në qiell. Ne do të shikojmë Air Albania në qiell dhe mendojmë se do të jetë krenaria e Shqipërisë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.