‘Fiskalizimi’, Denaj: Sektori bankar është me rëndësi të veçantë për konsultimin publik dhe për Ministrinë e Financave
Ministria e Financave dhe Ekonomisë organizoi takimin e radhës me grupet e interesit për konsultimin e projektligjit mbi ‘Fiskalizimin’. Kësaj here konsultimi publik u zhvillua me përfaqësues të Shoqatës Shqiptare të Bankave. Ministria e Financave dhe Ekonomisë, Anila Denaj vlerësoi sektorin bankar si një komponent me rëndësi të veçantë për sa i përket ‘Fiskalizimit’.
“Sektori bankar përbën një komponent shumë të rëndësishëm të këtij procesi dhe ne duam vërtet ta nisim mbarë duke marrë komentet tuaja që në fillim për këtë projektligj, si dhe për akte të tjera të mëvonshme” u shpreh ministrja Denaj.
Ndër të tjera, ministrja Denaj tha se konsultimi publik i projektligjit do të vazhdojë edhe në javën e parë të shtatorit.
“Meqenëse gushti njihet si një periudhë, e cila ka flukse më të limituar, mundet që edhe java e parë e shtatorit, deri në datën 9 shtator, të vlejë për komente për të gjitha palët e interesuara, pasi ky projektligj i takon të gjithë bizneseve dhe të gjitha organeve shtetërore dhe administratës, asaj Tatimore në veçanti, për të përmirësuar mënyrën se si regjistrimi dhe baza e të dhënave ndodh dhe procesohet në kohë reale” sqaroi Ministrja.
Konsultimet publike të radhës do të zhvillohen nesër, në datë 29 Gusht, në Këshillin e Investimeve dhe tryezën e diskutimit me përfaqësues të sektorit të Telekomunikacionit.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.