“Fiskalizimi”, Ministria e Financave: Çfarë parashikohet të ndodhë gjatë muajit gusht
Ministria e Financave dhe Ekonomisë kujton tatimpaguesit dhe të interesuarit se projektligji “Për faturën dhe sistemin e monitorimit të qarkullimit”, prej datës 1 gusht është hedhur për konsultim publik, sikundër është njoftuar më herët nga ministrja Anila Denaj. Faza e konsultimit publik do të zgjasë deri në fund të muajit Gusht 2019.
“Për Ministrinë e Financës dhe Ekonomisë, gjatë kësaj periudhe, vlerësohet shumë i rëndësishëm procesi i konsultimit publik, ndaj fton të gjitha grupet e interesit dhe opinionin në tërësi, të japin komentet dhe sugjerimet e tyre, me qëllim mbarëvajtjen e një procesi transparent dhe gjithëpërfshirës.
-Ju bëjmë me dije se këtë projektligj, i njohur ndryshe edhe si “Fiskalizimi”, të gjitha palët e interesuara mund ta gjejnë në platformën online: http://www.konsultimipublik.gov.al/Konsultime/Detaje/195.
-Drejtoria e Përgjithshme të Tatimeve, në faqen e saj zyrtare ka krijuar një meny të dedikuar mbi fiskalizimin: https://www.tatime.gov.al/c/424/fiskalizimi në të cilën do të gjeni, gjithashtu, projekligjin dhe pyetjet më të shpeshta dhe përgjigjet për secilën prej tyre, në mënyrë të përditësuar.
-Për marrjen e komenteve, pyetjeve dhe sugjerimeve në dispozicion të çdo të interesuari, është një staf teknik i dedikuar, i cili mund ta kontaktohet përmes adresës së postës elektronike: [email protected].” njofton Ministria e Financave dhe Ekonomisë.
Gjithashtu, me qëllim garantimin e një komunikimi sa më të plotë, janë planifikuar të organizohen tryeza të gjera diskutimi me grupe interesi, si me: kontabilistë, specialistë të sektorit të Informacionit dhe Teknologjisë, shoqatat e biznesit, dhomat e tregtisë, Këshillin e Investimeve, Këshillin Konsultativ, Tatimor, etj.
Projektligji, synon krijimin e një sistemi të ri faturimi dhe monitorimi të transaksioneve të bizneseve në vend. Ai parashikon që, duke nisur që nga data 1 Janar 2020, të gjitha transaksionet midis bizneseve dhe konsumatorit do të raportohen te Administrata Tatimore në kohë reale, bazuar në sistemin e ri të pajisjeve fiskale, ndërsa nga 1 Janari 2021, të gjitha transaksionet ndërmjet biznesit me njëri – tjetrin dhe ndërmjet biznesit me organet publike do të bëhen në bazë të faturës elektronike.
Reforma e Fiskalizimit konsiderohet nga qeveria shqiptare një angazhim madhor në përpjekje për të minimizuar ekonominë informale, përmes modernizimit të sistemit të monitorimit të taksave. Qëllimi i këtij projekti është:
-Minimizimi i niveli të ekonomisë informale;
-Përmirësimi i mbledhjes së të ardhurave;
-Identifikim më i lehtë i evazionit fiskal;
-Bërjen e auditimit të taksave më kost-eficiente;
-Ulja e nivelit të korrupsionit në administratë;
-Ofrimi i më shumë shërbimeve publike për qytetarët dhe biznesin;
-Pozicionimi i Shqipërisë më afër standardeve të Bashkimit Europian.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.