“Fitch” për Shqipërinë: Rritja në 3.3% në 2017 dhe një paralajmërim i çuditshëm
“BMI research”, pjesë e “Fitch Group”, ka publikuar analizën e fundit të riskut për Shqipërinë për tremujorin e dytë të këtij viti. Sa i përket projeksioneve, agjencia e vlerësimit, nënvizon se, ekonomia shqiptare do të rritet me vetëm 3.3% përgjatë këtij viti.
Ky projeksion është bindshëm larg objektivit dhe projeksioneve të Qeverisë shqiptare, por edhe Fondit Monetar Ndërkombëtar. Ky i fundit projekton një rritje të ekonomisë shqiptare me 3.5% përgjatë këtij viti. Edhe sa i përket vitit të ardhshëm, agjencia projekton një rritje të ekonomisë po me 3.3%.
Norma e inflacionit ndërkohë, projektohet në 3.1% përgjatë këtij viti, dhe në 3.4% sa i përket vitit të ardhshëm. Në pjesën që i referohet vlerësimeve dhe rreziqeve që i kanosen ekonomisë ndërkohë, agjencia jep një paralajmërim disi të çuditshëm.
Kur flet për rreziqe, agjencia, nënvizon se, rreziku për regres është më i lartë për ekonominë shqiptare, në rast se, opozita do të marrë pushtetin. Në pjesën që vlerëson ecurinë e ekonomisë gjatë dy viteve të fundit, thuhet; “Shqipëria ka bërë progres në adresimin e sfidave politike gjatë dy viteve të fundit, por, testi i vërtetë do të jetë kur vendi ti drejtohet zgjedhjeve, në 18 qershor. Besojmë se, koalicioni qeverisës do të vijojë të mbetet në pushtet, duke garantuar një vijimësi të politikave”.
Kërkesa e brendshme do të vijojë të mbetet e fortë, me shpenzimet në infrastrukturë që do të vazhdojnë ta mbajnë ekonominë shqiptare ndër ato me rritjen më të shpejtë në rajon përgjatë viteve 2017/2018.
Një tjetër rrezik ndërkohë, konsiderohen faktorët e jashtëm, sidomos një përkeqësim i mundshëm i ekonomisë greke apo italiane, çka do të gjeneronte rënie të remitancave, e për rrjedhojë, inflacion më të lartë dhe rënie të konsumit privat.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.