“Fitch” rrit projeksionet – “Ekonomia shqiptare në vrull këtë vit dhe atë të ardhshëm”
“Bmi research”, pjesë e Fitch Group, që është një ndër tre agjencitë më të mëdha të vlerësimit të kreditit në botë, së bashku me Moody`s dhe Standard and Poor`s, ka rritur ndjeshëm projeksionet për ekonominë shqiptare për këtë vit dhe atë të ardhshëm.
Raporti i fundit i agjencisë tashmë flet për një normë rritje të ekonomisë prej 4% për këtë vit, nga 3.6% që projektonte më parë, ky është muaji i dytë me radhë në rritje. Në harkun e dy raporteve të fundit, Fitch ka rishikuar në rritje ekonominë shqiptare me plot 0.7 pikë përqindje.
Edhe për vitin e ardhshëm, agjencia duket bindshëm më optimiste, pasi flet për një normë rritje të ekonomisë prej 3.6%, nga 3.3% që vlerësonte në raportin e kaluar.
Ky rishikim, thuhet në raport, merr shtysë nga ambienti i jashtëm si dhe përmirësimi i profilit të riskut, rrjedhojë e zgjedhjeve të përgjithshme të Qershorit. Stabiliteti politik, së bashku me lehtësimin monetar të Bankës Qendrore, thuhet më tej mes rreshtave, do të përmirësojnë edhe konsumin privat si dhe investimet e huaja.
Në pjesën ku renditen këndvështrimet e agjencisë për Shqipërinë, raporti hapet pikërisht me zhvillimet më të fundit në vendin tonë dhe përfshirjen e ish-ministrit të Brendshëm në një proces hetimi. Kjo gjë, thotë raporti, mund të dobësojë mazhorancën qeverisëse.
Një tjetër vlerësim i agjencisë i referohet çmimeve të konsumit, që mesa duket do të rriten ndjeshëm në gjysmën e parë të vitit të ardhshëm. Në pjesën e risqeve, agjencia fokusohet thuajse ekskluzivisht te borxhi dhe rrezikun në të cilin mund të gjendet ekonomia nëse ky borxh fryhet apo mungon vullneti politik për të vijuar me reformat dhe konsolidimin fiskal.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.