Fitimi i bankave arrin në 20.2 mld lekë për 11-mujorin e 2017-s

Fitimi i sistemit bankar shqiptar preku një rekord të ri në fund të muajit nëntor. Sipas të dhënave nga Shoqata Shqiptare e Bankave, për 11 mujorin e vitit 2017 bankat fituan 20.2 miliardë lekë, fitimi më i lartë i regjistruar ndonjëherë.

Krahasuar me të njëjtën periudhë të një viti më parë, fitimi është rritur me afro tre herë. Faktori më përcaktues në rritjen e lartë të fitimeve është padyshim përmirësimi i ndjeshëm i cilësisë së portofolit të kredisë.

Në fund të nëntorit, raporit i kredive me probleme zbriti në 14.3%, niveli më i ulët në shtatë vitet e fundit. Veç të tjerash, ky përmirësim ka ulur në mënyrë drastike shpenzimet e bankave për provigjione, duke ndihmuar rrjedhimisht në rritje të ndjeshme të rezultatit financiar.

Rritja e fitimeve e bën sistemin bankar më të shëndetshëm dhe më optimist për të ardhmen. Kjo pritet të ketë një efekt pozitiv edhe në çlirimin e kreditimit në të ardhmen.

Sidoqoftë, duhet theksuar se fitimet e larta ngelen të përqendruara në pak banka të mëdha, ndërsa shumica e bankave kanë përfitueshmëri në nivele normale, madje në disa raste modeste.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.