Fitimi i HSBC rritet me 448% – Banka më e madhe në Europë nxitet nga operacionet në Azi

Banka më e madhe nga asetet në Europë, HSBC, raportoi rezultatin për tremujorin e tretë, me fitimin përpara taksave që u rrit me 448% nga viti i kaluar. Fitimi u rrit në 4.62 miliardë dollarë, nga $843 milionë që ishte në tremujorin e tretë 2016.

“Rrjeti ynë ndërkombëtar ka sjellë një rritje të fortë në tremujorin e tretë dhe biznesi në Azi ka rezultuar në kthime më të larta dhe rritje të huadhënies, veçanërisht në Hong Kong”, tha kreu ekzekutiv i HSBC, Stuart Gulliver.

Azia ishte nxitësi kryesor te kreditë, sigurimet dhe manaxhimin e pasurisë.  Rajoni përbënte për 87%, apo 4 miliardë dollarë të fitimit përpara taksave të HSBC.

Analistët thonë se ndërsa Brexit ka qenë një problem për shumicën e bankave në rajon, gjenerimi i më shumë se gjysmës së të ardhurave nga Azia përbën diçka pozitive për HSBC.

E listuar në Hong Kong, Londër dhe New York, banka ka patur performancë pozitive në të gjithë bursat pas raportimit, ndërkohë që në Hong Kong ka shtuar 24% për këtë vit. Analistët thonë se treguesi me bazë vjetore vjen prej shpenzimeve të jashtëzakonshme të bëra në 2016-ën, që nënkupton se fitimi tremujor do të jetë më i ulët.

Përveç zhvendosjes së prioritetit në Azi, banka ka reduktuar operacionet në vende të tjera, përfshirë shitjen e biznesit në Brazil.  Fitimi në të njëjtën periudhë të vitit të kaluar, pati ndikim negativ nga shitja e biznesit në Brazil dhe lëvizjeve në valutë.

Banka ka mbajtur një nivel të mirë të mbulimit me kapital, pavarësisht një serë riblerjesh të asksioneve. Raporti i mjaftueshmërisë së kapitalit ra lehtë në 14.6% nga 14.7% që ishte në tremujorin e dytë.

Ashtu si homologët europianë, edhe HSBC raportoi një rënie me 5% në të ardhurat nga tregtimi i titujve të borxhit, valutave dhe lëndëve të para gjatë tremujorit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.